Mes: Mai 2025

Eric Buisan, qui encontram uei dens En Ondas, que’u costegi despuish bèras annadas pr’amor qu’ei ua de las prumèras personas senon la prumèra a m’aver demandat de difusar programas mens sus l’antena de Pirenèus ràdio. Per tant d’aver regularament contactes epistolars per corrics, o alèrta – qu’ei arribat – sus la qualitat sonòra aproximativa de l’emission [har e tornar har… qu’ei tostemps tribalhar], non l’èi pas jamei encontrat a de bonas e entenut tot dòi ! Un bon parat lavetz qu’aquera seria Passion ràdio que de’u poder entervistar, eth qui hesteja aquestes torns quaranta ans de ràdio.

Curiós quin s’agèrgan las causas ! Despuish totas aqueras annadas – mei de dotze probable- qu’èra Eric Buisan, lo fidèu, qui hicava las mias edicions d’En Ondas, d’E n’ètz d’avís ? o de Jòclong [e probable de hèra d’autes qui com Patrick Avakian, dab H1000, e produseishen beròis programas] en servici sus Pirenèus ràdio. La setmana quan ac dèisha, Eric, qu’ei eth tot bèth juste lo noste interlocutor. Quina delicatessa n’a pas, de s’esfaçar atau. Que nse’n ditz las rasons per las quaus e vòga sus d’autas ondas d’ara enlà deu costat de Lorda. Be soi plan d’acòrd dab eth : se çò que nse platz dens la ràdio qu’ei har ràdio, e ben qu’avem a har ràdio. Esperem que sus la ràdio qui intègra uei qu’ei çò qui’u plaserà de har e que n’averà largança. Estar en carga…, trobar las finanças…, e manejar las equipas… n’ei pas probable çò qui’vs realiza lo miélher. Pireneus radio : https://pireneus.info. Enrasigada despuish 2006 au còr deus Pirenèus centraus e a la hita dab la Vath d’Aran, Pirenèus – ce persegueishen – qu’ei plan mei qu’ua simple ràdio. Qu’ei un mèdia de pròche, un espaci d’encontre e de partatge dedicat aus abitants deu territòri. De descobrir ua rica programacion d’actualitats hèitas per ua jornaliste, musica e emissions tematicas, concebuda entà miralhar la diversitat e las aspiracions deus dus costat de la termièra…
contact@pireneus.info
05 62 00 53 17
Pirenèus Radio
1 Rue du Château
31440 Cierp-Gaud
L’entervistat men qu’ei Eric Buisan *
Eric Buisan qu’èra dejà, petit, fan d’ondas bracas o petitas dens lo pòste de ràdio !
Que concep lo son ròtle en ràdio enter teatre, telegrafa e guardacomun.

• Mauaisit de contactar a Silvià Puértolas Solé tau programa d’actualitats ‘Es informacions des Valls’, aranesa de Bossòst en carga de las informacions e probable bèth tròp cuentada o lo sénher Yannick Sanchez, navèth president qui non tornè pas juntar a En Ondas. La ràdio qu’ocupa !

Aquera seria Passion ràdio, que soi en tanben urosa de la ve presentar pr’amor las classas d’occitan de l’escòla La Fontaine e deu collègi Felix Pecaut de Salias de Bearn – sus proposicion e organizacion d’Evelyne Laborde e de Madeline Lamour-Leroy – que s’aligan entà produsir Occigang. Que’n difusam en aquera edicion d’En Ondas, tres capsas radiofonicas de la lor confeccion, dont entà sortir de l’emission, un solò de Ruben sus l’Ekiden, corruda-transmission japonesa de hicar en parallèle dab La Passem (qu’escotam dens l’emission « Mars e Montanhas » deu disc tot fresc pareishut de Trencadit en aumenatge a Ligams-La Passem !). E d’abòrd qu’escotam ua capsa de presentacion, dab un sonau d’in·hèrn ! apuish ua auta capsa d’Occigang costat collègi, suu rite de Marteror, qui obriva solide los ensenhaments a la rentrada de 2024. Mercés a Eliot, Nataël, Adrian, Jan, Camille, Marius, Constància, Yannis e Ruben… e perdon se n’èi pas lhèu la faiçon d’escríver los vòstes petits noms.

Las musicas d’En Ondas
• Otxo Kokinak la cançon eponima
• Trencadit lo dusau álbum Las Honts Mars e Monts
• Mallacán Chera, chera Resiste, resiste
• Radio head Hunting bears
 Sonaus de Joan Francés Tisnèr Winter Surge inedit