Category: Ràdio podcast de resisténcia en occitan

En Ondas setm. 17 Eric Fraj

ABC del Saber,Constantin Castoriadis,En Ondas,Eric Fraj,Erich Fromm,Fernand Vedel,http://www.reclams.org,Michel Grosclaude,Ràdio podcast de resisténcia en occitan,Reclams edicions

En aquera edicion d’En Ondas que devisam dab Eric Fraj [professor de filosofia, de castelhan, autor-compositor-interprèt…], dens l’ABC del saber n° 3, cap-redactor e autor, dab l’Editoriau, lo Lexic e un article sus l’inumanitat. L’Abc del saber n° 3 Umans tròp umans ?, 124 pp. color ; 19 euros en çò de Reclams edicions.

Articles a l’asard qui n’averam quitament pas avut lo partat d’evocar dens l’entervista :
– Alem Surre-Garcia, lo culte de Mithra, percaçat per la glèisa a Tolosa en 2024
– Jaume Jaussaud-Max Valax : ressorças « umanas” avetz dit umans ? Gestion deu personau d’autant mei violent parièr que klo personau e vad riale e mots (donc concèptes) qui passan aus oblidats : « classa obrèra”… quan precaritat, espleitacion que perduran eths !
– Sèrgi Javaloyès – en aumenatge a Itxaro Borda, l’escrivana basca – la Poste ® com antidòt d’umanitat epistolària e amistosa : un moment suspenut qui anima la revista.
– E lo passionant article d’excelléncia de Fernand Vedel deu quau parlam, especialista de l’ADN, sus las originas umanas : de las poscas d’estelas a la perfeccion autoproclamada : lo sapiens. Un Sapiens – qui n’ei pas briga savi – qui s’i escad dens lo darrèr quart d’òra deu planeta a s’ac tot destrusir… Lo Neandertal, que sabó víver en equilibri dab l’environament, que serà estat eth, luenh d’estar autant bruta que n’èm nosautes : qu’aligam demografia e creishença a contunha en un monde fenit e constrenh.

Reclams edicions 18 camin de Gasconha 31800 LANDORTHE
reclamsedicions@hadiu
Lo blòg https://abcdelsaber.fr/
Legem e tornem léger L’ABC del saber e en especiau aqueth numèro 3 Umans, trop umans ?https://www.reclams.org/fr/catalogue/produit/204-l-abc-del-saber-umans-trop-umans

Las musicas d’En Ondas
• PPF Ua botelha a la mar
• Yann van den Cruyssen Seasons after fall – Intro
• Andrea Volenweider Into the burning circle
• Arnau Obilos Els carrèrs seràn el cèl
• Arild Andersen Electra Big bang [d’alhors dens L’abc n° 3 Fernand Vedel que ns’indica que lo Big Bang ne seré pas lo generator deu noste univèrs mes meilèu la resultanta.]
• Christian Vieussens Esquiç seguit d’Auròst Esquiç 5
 Sonaus de Joan Francés Tisnèr Winter Surge inedit

En Ondas setm. 16 Cristian Lagarda

Abat Josèp Salvat,Andriu Lagarda,Cristian Lagarda,En Ondas,https://www.oc-cultura.eu/projets-en-cours/plumas-estudis-de-literatura-doc-moderna-e-contemporanea/,Laurent Abrat,Lengas,Lengas e poders,Lo gai saber,Louis-Jean Calvet,Prèmi Jaufre Rudel,Ràdio podcast de resisténcia en occitan,traduccion,Traduccion en occitan

En aquera edicion d’En Ondas que devisam dab Cristian Lagarde.

L’Abc del saber n° 3 Umans tròp umans ?, 124 pp. color ; 19 euros en çò de Reclams edicions
(e dont soi la directora de publicacion : conflicte d’interès, shens objècte declarat !)
Cristian Lagarda que signa L’uman, « òme de paraulas”, l’article de referéncia au quau e’vs cau referir lavetz ! On coneisheratz mei plan a Ferdinand de Saussure enter autes.
Cristian qu’ei lo geniau provedidor e vulgarizator sintetic de questionaments e de cèrcas.
L’ABC qu’ei un libe-magazine d’articles en occitan sus granas questions actuaus. Dens ua pluralitat lingüistica e disciplinària (filosofia, arts, sciéncias sociaus, sciéncias duras…). Aqueth numèro qu’ei consacrat a l’uman : l’evolucion biologica despuish «lo començar» de l’univèrs (si per tant a un començar l’univèrs e si ei unic) dinc a l’intelligéncia artificiau e au transumanisme en passant per la fòrça deu mite, lo lengatge, l’accion politica, la question deu handicap o l’experiéncia de l’avegèr. A la lópia un quinzenat de realitats umanas de prumèr ordi, tostemps dens ua volontat espinozista: “Ni ríder, ni plorar, compréner”.
Que profieitam de l’aver dab nosautes tà evocar la/lo :
* lenga, lengatge, devís-discors, …, paraula emetuda e decodada, signe e trèit, comptatge e dessenh, movement e dança, lengatges «umans» de las flors, de las plantas e deus arbos, de la pèira e de las bèstias, de las aulors (be hè mei d’un mes que la casa embauma mirifica de la flaira d’irangèr : ua veranda acostada qui permet de cauhar casa a l’entersason e de la perhumar : rason de l’imatge d’acompanhament. Poder de lenga qui seré la marca de l’uman… ?
E inuman ? Justament n’escotem pas a la fachoesfèra… lo lengatge corporau de l’Adòlf, lo 1984 de George Orwell realizat peus umanimaus que son l’El e lo Don !
Las questions mei precisas que son lo bilingüisme en situacion de diglossia ; la lenga a l’espròva de nacionalismes – lo o los deu(s) quau(s) e pateish en aqueths temps de globalizacion – e lo qui n’a pas desvolopat… E serem mei neandertaus los occitans que non pas sapiens qui amuishan tant la lor non-saviesa ? Qu’ei Fernand Vedel qui indica dens l’ABC del saber n° 3 que Neandertal que viu en equilibri dab l’environament quan Sapiens e’u s’espleita.
Un luxe de projèctes tà C. Lagarda : revista Lengas, (seteme de 2025 L.-J. Clavet Glotofagia) revista Plumas sus l’autotraduccion ; Memòrias de l’occitanisme 1960-80 – 150 demandas enviadas despuish 2023 e un petit cent de contribucions… e solide tot çò qui n’avom pas lo temps de devisar.

Qu’acabi per vos evocar :
– Hannah Arendt [vaduda a Hanòvre en 1906 † 1975 en l’Uper street Navajorqués] : Lo son país qu’ei la soa lenga.
– Barbara Cassin parenta luenhèca ce’m sembla de René Cassin lo baionés, un deus redactors actius (jurista de la resisténcia) de la declaracion universau deus drets de 1948, on lo dret a la lenga soa ei essenciau. Sèi pas perqué ve’n parli, non s’i refereish pas jamei. Barbara qu’a escriut, enter autes obratges, Eloge de la traduction.
De mentàver lo blòg qui acompanha la revista annau de l’ABC del Saber : https://abcdelsaber.fr/
l’adreça mail : reclamsedicions@gmail.com
ligam sus la revista : https://www.reclams.org/fr/catalogue/produit/204-l-abc-del-saber-umans-trop-umans
lo telefonet : 06 87 80 28 60

Las musicas d’En Ondas
• Björk Biophillia Virus
• Adria Grande Divisa Cinemascope, Camin, El Cèrvol
• Bobby MacFerryn Circlesong 1
 Sonaus de Joan Francés Tisnèr Winter Surge inedit

En Ondas setm. 15 Sèrgi Javaloyès

Cristian Lagarda,En Ondas,Eric Gonzales,Literatura occitana,Ràdio podcast de resisténcia en occitan,Reclams,Sèrgi Javaloyès

Que m’agrada pro de cultivar regularament la conversacion dab los o las qui’m vòlen plan parlar. Sèrgi Javaloyès qu’ei d’aquestes qui la vòu neurir e entertiéner aquera conversacion e qui prenen la fòrma d’emission « En Ondas ».
Que l’encontram a perpaus de quate parucions :
* ua editada a Monhelios en 2024 D’un samedi à l’autre… Chroniques 2002-2024, ua seleccion peu miei deu mei de mila de cronicas setmanèras « D’ici étant” escriutas entau quotidian La République des Pyrénées sus mei de vint ans, 167pp. cob color Lo Gavisòs qui eth e jo e s’aimam plan, 16 euros.
e duas per viéner : ua version visitada tornar e titolada Que t’enviarèi tot lo men amor, per paréisher a Reclams en occitan, apeada suu roman sortit d’abòrd en francés en 2018, a In8 Viral (237 pp. cob. col, 17 euros) e mei un dusau poèma epic – après Sorrom Borrom ou le Rêve du Gave en 12 cants dont l’eroïna ei Bernadeta Sovirons qui acaba de compausar.
* enfin ua auta publicacion qui a contribuit a l’edicion e qui ei lo darrèr libe d’Eric Gonzalès qui’s morí d’abòrd que de l’aver portat a edicion, un policièr en la colleccion « Vias negras”, lo numèro 3 : Auròst entà ua escort en çò deus Reclams en 2023-2024, 170 pp. cobèrta color (en IA) e quauques plaps de tinta sus cada prumèra pagina de capítol tà animar la nosta lectura. Non dissimulam pas lo plaser de costejar lo monde plen de suspresas de Gonzalès. Com ditz Sèrgi ‘dab Auròst qu’as la mapa e la bossòla !‘

D’autes programas d’En Ondas en companhia de Sèrgi Javaloyès : https://hadiu.eu/?s=Javaloy%C3%A8s

Las musicas d’En Ondas
• Miles Davis A kind of blue All blues, s’èi bona la memòria qu’ei ua musica que la de Miles Davis qui Sèrgi aprecia au-delà (extrèit)
• Violons du Rigaudon Arco Alpino Lo Bacubèrt (extrèit)
• Kronos quartet Cry of a Lady (extrèit)
 Sonaus de Joan Francés Tisnèr Winter Surge inedit

Cobèrta de Que t’enviarèi tot lo men amor tà paréisher en çò de Reclams edicions © Maria Javaloyès Taïbi

En Ondas setm. 14 Josiana Ubaud

Botanica en occitan,En Ondas,Etnobotanista,Josiana Ubaud,L'Aucèu Libre,Letras d'òc,Letras d'Oc,Lingüistica,Occitan-gascon,occitan-lengadocian,occitan-provençau,Ràdio podcast de resisténcia en occitan,Vent Terral

Juntem a la persona d’excepcion qui ei Josiana Ubaud http://josiane-ubaud.com/
La frasa qui a causit de hicar en exèrgue suu site, qu’ei de Joan Bodon Lo libre dels grans jorns : « Es pas vengut a degun l’idèa de tombar cap de catedrala. Nòstra lenga es mai qu’una catedrala. Alara donc perqué son tantes que s’afanan per la desboselar…»
Autora enter autes obratges de compte har d’un diccionari scientific dens los dus sens occitan-francés e francés-occitan : matematica, informatica, fisica, tecnologia e quimia.
Dens la presenta edicion d’En Ondas qu’evocam quauques uns deus sons obratges :
• lo pamflet pareishut en 2022 a l’Aucèu Libre La Romèca occitanofòba 88p. cob. col 12 euros
• en çò de Vent Terral en 2022 (edicion corregida e completada) : Diccionari ortografic, gramaticau e etimologic de l’occitan d’après los parlars lengadocians 32 + 200 + 864 pp. Diccionari limitat a 119000 entradas. 48 euros.
• tà clavar – arron aver recebut dens En Ondas au Jacolet Abadia qui gavida lo libe de la Chélidoine : des plantes, des femmes, des hommes en Gascogne, pareishut en çò deu C.L.A.B. augan – La flòra illustrada de la mar al mont (occitan lengadocian e provençau) en çò de Letras d’Òc 272 pp. cob. e illustracions colors, 30 euros qui sòrt tot juste de paréisher quauques setmanas i a. Plantas sauvatjas classadas per demiei (la duna, la sansoira (lo palud), l’eusièra (seuva de cassos verd), la montanha, los lòcs umides, los sòus calcaris e siliçós, las vielhas parets, etc.), per colors per las erbacèas floridas de cada mitan (blanc, blau, jaune, ròse, roge, violet), per caractèrs distintius (la bauquilha (graminèas), las lianas, los cardons, las plantas aromaticas, las plantas parasitas, las plantas comestiblas). Mei tot l’aspècte scientific e etnòbotanic, un lexic elementari de botanica e tres lexics francés-occitan-latin. Ua soma qui n’ei pas que lo començar de çò qu’a enterprés Josiana Ubaud, qui ei per paréisher lèu.

Josiana Ubaud, autora arderosa, lingüista e lexicografa, etnobotanista en lo maine occitan, e enter autes engenhs, hemna de terrenh com se defineish era medisha, en estar atentius a la sortida de las enciclopedias per viéner en çò de la Fenestrelle.

L’emission d’En Ondas dab Jacolet Abadia qu’ei per aquiu : https://hadiu.eu/2024/11/25/en-ondas-setm-48-jacolet-abadie/
De notar lo noste interès redoblat e los occitans n’i escapam pas cap a las plantas – au quite moment d’ua sheisau extincion de massa qui n’estauviarà pas au vegetau e dont los òmis son l’encausa… mentavem :
Flors salvatjas del Perigòrd amigas mespresadas Tòme 1, Jean-Louis Orazio, bilingüe en çò de Novelum IEO Perigòrd, 2024, 20 euros
e
Etymologia botanica de Michel Chauvet, Biotope éditions, 792pp., 2024, 39 euros

Las musicas d’En Ondas
• Bachas Littorales Aria dau sera
• Muga – Chants de Femmes des Asturies – Ramu a la Virxen de la Flor de Pría
• Didier Tousis Tousis en Òc La lenga aus pòts
• Brice Diusit Guilhem d’Aquitània Pus vezem de novelh florir
 Sonaus de Joan Francés Tisnèr Winter Surge inedit

En Ondas setm. 13 Pierre Joris [1946-2025] – Felip Biu

En Ondas,Felip Biu,Gargàs,Nicole Peyrafitte,Nicole Peyrahitte,Per Noste,Pierre Joris,Ràdio podcast de resisténcia en occitan

Edicion contrastada d’En Ondas !

D’abòrd de trobar a Felip Biu qui nse parla de la publicacion – a Per Noste – deus Récits d’histoire sainte en béarnais, objècte visitat tornar, de la soa tèsi de doctorat sostienuda 2011, que’vs volerí har enténer a Pierre Joris.
Vadut en 1946, Pierre Joris, poèta, antologista deus corrents poetics non majoritaris (dab Jérôme Rothenberg), òmi de ràdio, escrivan, professor de literatura e artista performatiu dab Nicole Peirafita, que s’ei mort lo 26 de heurèr d’augan.
Que nse parla de la literatura occitana deus trobadors au truvèrs l’influéncia qui avó sus autors americans deu sègle XIXau-XXau com Ezra Pound * e d’autes deu sègle XXau com Allan Ginsberg, dens aqueths petits extrèits. Que son tirats de la partida finau de las questions d’ua conferéncia captada en 2009 tà l’Estivada de Rodés, moment programat per Maria-Joana Verny. Que saludam la mort en heurèr de 2025 d’un gran coneishedor de la poesia mondiau deu sègle XXau e XXIau e de las soas honts. Qu’èra vadut en 1946. Lo son site : https://pierrejoris.com/
Juntem adara a Felip Biu professor de literatura, de latin-grèc com d’occitan e i comprés deu son shiular entà discutir deu tot prumèr tèxte de literatura, aqueste d’inspiracion religiosa e mei precisament de la creacion deu monde, coneishut en bearnés e qui data deu sègle XVau. Récits d’histoire sainte en béarnais, un anonime, Tòme 1, novèla edicion critica, novèla arrevirada 406pp. Cob. col. Classics gascons ; 14. 18,50 euros en çò de Per Noste.

Las musicas d’En Ondas
• De La Crau Tempèri Chaman
• Pierre Joris extrèit conferéncia de 2009 a Rodés tà l’Estivada
• Pierre Joris Routes, no Roots This afternoon Dante
• Michael Bisio contra baishista Nitro, don’t leave home without it
• Antoni Rossell e Benedicta Primault Psaumes protestants O vos creaturas deu cèu
• Atlas deus Cants sefarades de las sinagògas de Lengadòc Rosselló Kohl Mahanot
• Lo cant deus Prumèrs crestians Cant vielh roman VI-VIIau s.
• Tenarèze Aral Bueltea
 Sonaus de Joan Francés Tisnèr Winter Surge inedit

* Ezra Pound que viatja en Euròpa tà descobrir ua navèra|anciana civilizacion qui pensa trabucar dab la literatura deus trobadors. Batalhaire de clichès, d’a-priorisme deus mots e qui s’i dèisha gahar fin foinau : dividir la soa poetica e la soa ideologia ne’s pòt pas ce concludeishen mantuns biografes. Au darrèr de Robert Casillo que nse cau parlar de la question de las fobias poundianas : l’usura – de raportar au son nom pròpi de Pound = mesura, moneda ; paur au fallus ; paur a la hemna ; paur a l’incèste ; paur a la mort ; paur a l’afasia (pèrda de la paraula), etc… totas aqueras paurs resumidas per lo poèta dens un òdi unic : l’antisemitisme.

Programas autes d’En Ondas dab Felip Biu.

Programas autes d’En Ondas dab Pierre Joris.

En Ondas setm. 12 Joan Miquèu Dordeins

En Ondas,Fanny Lartigòt,Joan Miquèu Dordeins,Lo Topin de Lenga,Per Noste,Ràdio podcast de resisténcia en occitan,Reclams edicions,Simple tres

Deishem-nse embarcar per l’umor flegmatic de Joan Miquèu Dordeins au parat de la sortida de l’àlbum Lo Viatge de Joan Petit. Encontrem tanben a Fanny Lartigòt l’illustratora deu libe entau joenèr Lo Viatge de Joan Petit *. Dus envitats dens la presenta edicion d’En Ondas, l’autor e l’illustratora deu liberòt en çò de las edicions Reclams en 2025. Joan Miquèu Dordeins qu’ei ensenhaire a la retirada e autor. Qu’a publicat darrèrament aus Reclams lo roman policièr Murtres en cadena (2023) e un recuelh de novèlas en 2021 a Per Noste Dus dias sonque. Que se’n ditz mei suu liberòt entau joenèr qui pren per eròi un Joan Petit au quau e s’escaden plen de benalèjas.
Ua edicion drin singulara per part cuelhuda en ua crampa de convalescéncia, la vita quauque còp que resèrva causas inatendudas. Que nse permet d’evocar lo miei espitalèr, la vita e la recuperacion arron un accident vascular cerebrau. Autanplan l’importància de la lenga soa, l’occitan, dens las relacions umanas e los projèctes, la memòria… e los projèctes a maugrat que sia retrèit pro com tostemps lo Joan Miquèu entau parlar de çò qui a suu telèr.

* Tà’n saber mei sus Joan Petit, lo personatge istoric deu sègle XVIIau, un petit recèrc hèit entaus talhèrs de Yuan Gong qigong en occitan qui asseguri despuish quauques annadas e qui podetz léger ací baish :

Joan Petit – Wikipèdia + version gasconaDownload

D’autes programas d’En Ondas dab Joan Miquèu Dordeins : https://hadiu.eu/?s=Dordeins

De v’indicar, per escàs, lo tresau numèro de la revista annau de l’ABC (dab ua B hauta o de Barcelona aquera) qu’ei L’ABC del saber : Umans tròp umans ?, qu’ei tot juste pareishut.

Las musicas d’En Ondas
• Manuel De Falla sortilègis
• Simple Tres La canta d’Elvís
• Gilles Chabenat Edouard Papazian Le Traité des Songes L’œil de la lettre
• Laurent Audemart Escotija politiko
• Tazzuf Camaleons Daltònics Sota Mazurca
• Chocolate Jesus
• Perlimpinpin Fòlc Ua botelha a la mar
• Aèdes – Gaves – Coma l’aiga
 Sonaus de Joan Francés Tisnèr Winter Surge inedit

En Ondas setm. 11 Jean-Philippe Larrère

Emilien Langlade,En Ondas,Jean-Philippe Larrère,Lo Topin de Lenga,Quilhas de Nau,Ràdio podcast de resisténcia en occitan

© DR

Lo 8 de deceme de 2024 que’s debanè lo Topin de las Quilhas de Nau a Podens en Shalòssa.
Lo parat d’amassar monde a l’entorn d’aqueste, hòrt estetic e fin, jòc de quilhas qui s’adreça a totas e tots.
Coneishedors o curiós que’n sabón mei mercés a l’energia comunicativa deus deu club arcuelhedor un deus màgers de la federacion e qu’avom los demostradors e las demostradoras qui non s’estauvièn pas entà partatjar e parlar de la lor passion.
Lo public deu Topin de Lenga que s’i podó parièr essajar entà véder se ne’us plasora pas aqueth jòc fisic e d’astruguessa tant emblematic de la Gasconha sud occidentau : Bigòrra, Shalòssa e Bearn.
Aqueste espòrt en despresa pr’amor de rasons culturaus e societaus : imaginem la baisha drastica deus estanquets lòcs privilegiats deus plantièrs aqueras areas quadradas, qui hè que de terrenh de jòc n’i son chic mei. Non pleitejam pas per un consum inconsiderat d’alcoòl mes per ua revitalizacion de las campanhas o deus quartièrs dab lòcs sociaus e comerciaus.
Per exemple non i a guaire a Carressa e Cassabè, hens lo parçan deu Gave d’Auloron, qu’ei lo quite plantièr qui assobaca adara la pastisseria-panateria Lo molièr. Solide los gavidaires que comandèn ua fresca memòria au Yann Chatelin mes perqué non pas suggerir un plantièr acostat aus ediles ?
Ajam a l’esperit la non presa en compte d’aqueth hèit culturau e fisic peus ensenhaments escolars quan poderé estar diferent estóssem respectats com los qui èm.
Saunegem aus 32% d’ensenhaments «guanches» en las Islas Canàrias, en l’archipèl los mainats qu’an lo tèrç d’ensenhament, per exemple adobat dab silvo (lo shiular d’acerà) qui fòrma part de l’ensenhament de la lenga, las canas – qui son chancas tà avalir la pregondor e la distàncias en guardar los tropèths, en art ceramica e en dança pròpias. Estóssem autant gadiats e considerats : la lenga a l’escòla e shiulada autanplan – quantes lingüistas e gramaticians e escrivans n’averem pas, los instruments, las cantas e las danças – quantes artistas e creators non gessirén pas d’aquestes ensenhaments, chancas e quilhas – quantes monde plan hens la lor pèth e ahortits, calmas e concentrats non sortirén pas deus lòcs educatius !
Com ac suggereish lo noste interlocutor Jean-Philippe Larrère – estatjant de Sent Medard e jogador a Podens – qu’ei a l’escòla petita que tot aquerò e pòt e e deu començar !
Jean-Philippe Larrère que’u mercejam de s’estar prestat au jòc de l’entervista e que’u ne sabem grat de la soa paciéncia. Jean-Philipppe Larrère qu‘averam plaser a’u costejar tornar. Que’vs prègui de créder qu’ei tostemps partent entà recéber monde a l’entorn d’ua partida de Quilhas de Nau a Podens o a Sent Medard o en lòc que sia.

Los perlongaments :
– Lo site de la federacion de las quilhas de nau : https://www.ffbsq.fr/quilles-9/accueil hètz-ve sòcis qu’an l’amassada generau lo 5 d’abriu qui arriba ;
– Tà contactar lo Club de Podens, qd9515@ffbsq.org ;
– la mapa d’on podem jogar : https://www.ffbsq.fr/quilles-9/fr/ou-jouer/trouver-un-plantier.

Que senhalam mei que podem demandar a la federacion un torn de talanquèra desmontable dab un jòc de quilhas de Nau adultes òmis o hemna e i comprés mainats qui ei mobile e qui’s pòt prestar entà har iniciacions o partidas. De notar aqueste torn de talanquèras de jòc de quilhas de nau dab la porteta qu’ei un don d’ua equipa artistica qui coneishi de pròche.
Tà l’espectacle Quate e Choès que son tres magnifics jogadors de Pau Gilbèrt Lafenêtre, Fefé Lartigue e François Birou a l’arrastèra-escoba ipnotica qui s’i volón gahar. Sus ua creacion musicau de Joan Francés Tisnèr, cantada per Manufacture Verbale e ua coregrafia d’Yves Bernet. A la dança contemporanèa Sonia Onckelinx e tradicionau Puça Horndevath, Claudine Delille, Crestiana Mosquès e Lionel Dubertrand, au cuu-torn de la fin deus ans 90 e 2000, e dèn ua pèça dont la critica de dança deu jornau Le Monde, Dominique Fretard e relhevè la jòga « mei hòrta que la nocion d’aleatòri en çò de Mercè Cunningham”.
Quauques videos de Quate e choès d’espiar per aquiu : https://www.youtube.com/playlist?list=PLdFN97iu7wCMe5q5-3h7yX4FYJiGU4BWO

De’vs senhalar que las aventuras mesadèras deu Topin de Lenga que seràn pontuadas per ua Hèsta de la lenga : sauvatz ve’n la data tot lo dia deu 5 de julhet de 2025 a Salas de Baura. Sancèra dedicada a ua lenga viva e inventiva que perpausarà i comprés iniciacions a las quilhas : https://www.facebook.com/profile.php?id=100081099690336.

Las musicas d’En Ondas
• Albert Marcœur Sports et percussions Sports en plein air
• Cocanha Puput Lo Cotelon
• André Ricros e Gerard Douvisy Un piano dans le pré Dieu garda aquel que l’a plantat
• Diubiband Las hèstas de Cuqueron en mercejar en especiau a Eric Beillé, arderós en tot e i comprés en quilhas de Nau. Jogador cantaire e iniciator a las quilhas de nau.
• Erik Truffaz Saloua Spirale
• Joan Francés Tisnèr Transpòrts Tisnèr S.A. Empensat [Branlo en còrda regular]
 Sonaus de Joan Francés Tisnèr Winter Surge inedit

En Ondas setm. 10 Saladas sauvatjas de Magali Mariaud

èrbas de Provença,Domenja Lekuona,En Ondas,Joan Pèire Cavaille,Joan Pèire Cavalièr,Josiana Ubaud,Lengas e poders,Magali Mariaud,Ràdio podcast de resisténcia en occitan,Ràdio podcast en occitan,salada

En navèra escota.

L’èrba serena qu’amuisha lo camin.
• Lo somari de Patrimòni numèro 68 de mai-junh de 2017
• Lengas e Poders 2016-2017- sesilha 5, Joan Pèire Cavaille : Daniel Fabre, patrimòni etnologic e patrimòni lingüistic.
•Magali Mariaud qu’ei la nosta guida erborista. Que plegam l’esquina cap a la tèrra de Provença de cotria dab Magalia Mariaud e Léon lo son òmi. Qu’ei question de i cercar e trobar èrbas e saladas un hèish. Que mercegi au Leon e ben segur màgerment a Magalí qui’m deishè fotografiar la soa garba e qui nse’n regalè : un delici, a Jean Marotta lo noste sesame e a Joan Francés Tisnèr – viengut per tot auta causa – per l’enregistrament.

Complement sus las saladas sauvatjas dab lo site preciós de l’etnobotanista e linguista Josiana Ubaud http://josiane-ubaud.com/articles-web.htm
http://www.futura-sciences.com/comprendre/d/dossier265-1.php
e com ac ditz tant plan lo tèxte Chachèc de Didièr Tousis pp. 101-103 de Letras au Nin Editions du Bois.

De senhalar la parucion imminenta de la Flòra illustrada de Josiana Ubaud en çò de Letras d’Òc : 30 euros + 6 euros de pòrt en soscripcion

Flòra illustrada Josiana Ubaud Letras d'Òc 2025
Flòra illustrada Josiana Ubaud Letras d’Òc 2025

Las musicas d’En ondas :
• Erik Truffaz/Face-à-Face Quartet [Disc 2] The Walk Of The Giant Turtle (Intro) (Live 2006)
• Erik Truffaz/Face-à-Face Quartet [Disc 2] Flamingos (live 2006)
• Rosalina Cortial/Aital Va La Vida Troces D’un Erbier
• Patti Smith Trampin’ Mother Rose
• Feiz Noz Moc’h/Feiz Noz Moc’h Colorina D’Arrósa (Branlo)
 Sonaus de Joan Francés Tisnèr Crane airways deu disc Transpòrts Tisnèr S.A. e lo remix de Francés Dumeaux tà sortir de l’emission