De la geologia de la Vath deu Lui au bastit tradicionau e naturau de Sent Medard e entorns, en Vath deu Lui. D’escotar dens l’emission En Ondas de la setmana 49, qui sortirà lo diluns 1èr de deceme, en serada. En companhia agradabla de tres intervienent@s : Anaïs Lavielle, Clamenç Flouroux e Ivan Bareyre entervistats au Hestau Marteror (la dusau edicion), lo 1èr de noveme de 2025.Intervient vidèo en natura e au naturau : Ewan Plouma’ch de Campanha, un gran mercés 😊 a d’eth !
Au plaser !
De la géologie de la Vallée de Luy au bâti traditionnel et naturel de Saint-Médard et alentours À écouter dans l’émission En Ondes de la semaine 49, qui sortira le lundi 1er de décembre en soirée. En l’agréable compagnie de trois intervenants : Anaïs Lavielle, Clamenç Flouroux et Ivan Bareyre interviewés au Festival Marteror (la deuxième édition), le 1er novembre 2025. Intervenant de la vidéo en nature et au naturel : Ewan Plouma’ch de Campanha, un grand merci à lui ! Au plaisir !
Deishem-nse embarcar per l’umor flegmatic de Joan Miquèu Dordeins au parat de la sortida de l’àlbum Lo Viatge de Joan Petit. Encontrem tanben a Fanny Lartigòt l’illustratora deu libe entau joenèr Lo Viatge de Joan Petit *. Dus envitats dens la presenta edicion d’En Ondas, l’autor e l’illustratora deu liberòt en çò de las edicions Reclams en 2025. Joan Miquèu Dordeins qu’ei ensenhaire a la retirada e autor. Qu’a publicat darrèrament aus Reclams lo roman policièr Murtres en cadena (2023) e un recuelh de novèlas en 2021 a Per Noste Dus dias sonque. Que se’n ditz mei suu liberòt entau joenèr qui pren per eròi un Joan Petit au quau e s’escaden plen de benalèjas. Ua edicion drin singulara per part cuelhuda en ua crampa de convalescéncia, la vita quauque còp que resèrva causas inatendudas. Que nse permet d’evocar lo miei espitalèr, la vita e la recuperacion arron un accident vascular cerebrau. Autanplan l’importància de la lenga soa, l’occitan, dens las relacions umanas e los projèctes, la memòria… e los projèctes a maugrat que sia retrèit pro com tostemps lo Joan Miquèu entau parlar de çò qui a suu telèr.
* Tà’n saber mei sus Joan Petit, lo personatge istoric deu sègle XVIIau, un petit recèrc hèit entaus talhèrs de Yuan Gong qigong en occitan qui asseguri despuish quauques annadas e qui podetz léger ací baish :
De v’indicar, per escàs, lo tresau numèro de la revista annau de l’ABC (dab ua B hauta o de Barcelona aquera) qu’ei L’ABC del saber : Umans tròp umans ?, qu’ei tot juste pareishut.
Las musicas d’En Ondas • Manuel De Falla sortilègis • Simple Tres La canta d’Elvís • Gilles Chabenat Edouard Papazian Le Traité des Songes L’œil de la lettre • Laurent Audemart Escotija politiko • Tazzuf Camaleons Daltònics Sota Mazurca • Chocolate Jesus • Perlimpinpin Fòlc Ua botelha a la mar • Aèdes – Gaves – Coma l’aiga Sonaus de Joan Francés Tisnèr Winter Surge inedit
Lo 8 de deceme de 2024 que’s debanè lo Topin de las Quilhas de Nau a Podens en Shalòssa. Lo parat d’amassar monde a l’entorn d’aqueste, hòrt estetic e fin, jòc de quilhas qui s’adreça a totas e tots. Coneishedors o curiós que’n sabón mei mercés a l’energia comunicativa deus deu club arcuelhedor un deus màgers de la federacion e qu’avom los demostradors e las demostradoras qui non s’estauvièn pas entà partatjar e parlar de la lor passion. Lo public deu Topin de Lenga que s’i podó parièr essajar entà véder se ne’us plasora pas aqueth jòc fisic e d’astruguessa tant emblematic de la Gasconha sud occidentau : Bigòrra, Shalòssa e Bearn. Aqueste espòrt en despresa pr’amor de rasons culturaus e societaus : imaginem la baisha drastica deus estanquets lòcs privilegiats deus plantièrs aqueras areas quadradas, qui hè que de terrenh de jòc n’i son chic mei. Non pleitejam pas per un consum inconsiderat d’alcoòl mes per ua revitalizacion de las campanhas o deus quartièrs dab lòcs sociaus e comerciaus. Per exemple non i a guaire a Carressa e Cassabè, hens lo parçan deu Gave d’Auloron, qu’ei lo quite plantièr qui assobaca adara la pastisseria-panateria Lo molièr. Solide los gavidaires que comandèn ua fresca memòria au Yann Chatelin mes perqué non pas suggerir un plantièr acostat aus ediles ? Ajam a l’esperit la non presa en compte d’aqueth hèit culturau e fisic peus ensenhaments escolars quan poderé estar diferent estóssem respectats com los qui èm. Saunegem aus 32% d’ensenhaments «guanches» en las Islas Canàrias, en l’archipèl los mainats qu’an lo tèrç d’ensenhament, per exemple adobat dab silvo (lo shiular d’acerà) qui fòrma part de l’ensenhament de la lenga, las canas – qui son chancas tà avalir la pregondor e la distàncias en guardar los tropèths, en art ceramica e en dança pròpias. Estóssem autant gadiats e considerats : la lenga a l’escòla e shiulada autanplan – quantes lingüistas e gramaticians e escrivans n’averem pas, los instruments, las cantas e las danças – quantes artistas e creators non gessirén pas d’aquestes ensenhaments, chancas e quilhas – quantes monde plan hens la lor pèth e ahortits, calmas e concentrats non sortirén pas deus lòcs educatius ! Com ac suggereish lo noste interlocutor Jean-Philippe Larrère – estatjant de Sent Medard e jogador a Podens – qu’ei a l’escòla petita que tot aquerò e pòt e e deu començar ! Jean-Philippe Larrère que’u mercejam de s’estar prestat au jòc de l’entervista e que’u ne sabem grat de la soa paciéncia. Jean-Philipppe Larrère qu‘averam plaser a’u costejar tornar. Que’vs prègui de créder qu’ei tostemps partent entà recéber monde a l’entorn d’ua partida de Quilhas de Nau a Podens o a Sent Medard o en lòc que sia.
Que senhalam mei que podem demandar a la federacion un torn de talanquèra desmontable dab un jòc de quilhas de Nau adultes òmis o hemna e i comprés mainats qui ei mobile e qui’s pòt prestar entà har iniciacions o partidas. De notar aqueste torn de talanquèras de jòc de quilhas de nau dab la porteta qu’ei un don d’ua equipa artistica qui coneishi de pròche. Tà l’espectacle Quate e Choès que son tres magnifics jogadors de Pau Gilbèrt Lafenêtre, Fefé Lartigue e François Birou a l’arrastèra-escoba ipnotica qui s’i volón gahar. Sus ua creacion musicau de Joan Francés Tisnèr, cantada per Manufacture Verbale e ua coregrafia d’Yves Bernet. A la dança contemporanèa Sonia Onckelinx e tradicionau Puça Horndevath, Claudine Delille, Crestiana Mosquès e Lionel Dubertrand, au cuu-torn de la fin deus ans 90 e 2000, e dèn ua pèça dont la critica de dança deu jornau Le Monde, Dominique Fretard e relhevè la jòga « mei hòrta que la nocion d’aleatòri en çò de Mercè Cunningham”. Quauques videos de Quate e choès d’espiar per aquiu : https://www.youtube.com/playlist?list=PLdFN97iu7wCMe5q5-3h7yX4FYJiGU4BWO
De’vs senhalar que las aventuras mesadèras deu Topin de Lenga que seràn pontuadas per ua Hèsta de la lenga : sauvatz ve’n la data tot lo dia deu 5 de julhet de 2025 a Salas de Baura. Sancèra dedicada a ua lenga viva e inventiva que perpausarà i comprés iniciacions a las quilhas : https://www.facebook.com/profile.php?id=100081099690336.
Las musicas d’En Ondas • Albert Marcœur Sports et percussionsSports en plein air • Cocanha PuputLo Cotelon • André Ricros e Gerard Douvisy Un piano dans le préDieu garda aquel que l’a plantat • Diubiband Las hèstas de Cuqueron en mercejar en especiau a Eric Beillé, arderós en tot e i comprés en quilhas de Nau. Jogador cantaire e iniciator a las quilhas de nau. • Erik Truffaz Saloua Spirale • Joan Francés Tisnèr Transpòrts Tisnèr S.A. Empensat [Branlo en còrda regular] Sonaus de Joan Francés Tisnèr Winter Surge inedit
En Ondas qu’ei on ei qui tornam trabucar au Narcís Labòrda e qu’èm en companhia de Joan Eygun, lo creator e lo director de Letras d’Òc-Camins, las edicions joenas vadudas au miei deus ans 2000. Qu’èra viengut tà evocar lo desconeishut Narcís Labòrda au vilatge qui’u vedó a vàder (1835), estar maire e morir (1885). Qu’un lòc com Sent Medard e’s torne apropriar lo tribalh d’un autor qui escrivó los tres quarts de la soa òbra en occitan bearnés n’ei pas anodin. Que significa que l’expression poetica, de pròsa o politica qu’èra lavetz hèra mei plan partatjada tà hens la societat tota au cuu-torn deu sègle XIXau e XXau. Probable d’alhors que perdurè mei enlà tau ua afirmacion suu telèr shens cès arrehèita. Joguem que uei lo dia que contunha ! Duas bòrdas e un molin Hestau de Martror Topin de Lenga
Tà arribar d’ací quauques dias la Flòra illustrada de Josiana Ubaud en soscripcion a Letras d’Òc, de pas mancar !
Las musicas d’En Ondas • Deodat de Severac (St Feliu de Lauragués 1872 – 1921) Coin de cimetière au printemps • Joan Francés Tisnèr EBTè! La baish en tèrra plana (com ua creacion paisana) • Chants d’Auvernha Josèp Cantaloba Dama Kiri Te Kanawa • Giovana Marini Pier Paolo Pasolini Dansa di Narcis II • Guilhem Lopez lo qui camina celui qui marche pour ne pas se trouver Sonaus de Joan Francés Tisnèr Winter Surge inedit
Lo vent que s’ei invitat dens l’enregistrament miat a Sent Medard, cuelhut com a avut un momentòt Clamenç Florós, un deus iniciators deu prumèr Hestau de Martror. Que ns’ac voleratz perdonar. Que soi juste l’autora, productora, prenedora deu son, montaira, realizatora e difusaira d’En Ondas… E n’excellii pas en tot !
Qu’ei au parat d’un Topin de Lenga de l’abòr de 2024 : lo matin tà hens la seuva e dinc au Camp roman a erborizar e camparonejar – perdon peu neologisme – dab Cristau Contreiras e per la fin a sortir per ua vit renduda au bòsc. Non ns’ac avoran pas dit, non se’n serem menshidats… Un temps suspenut en natura : los mainats que se’n hasón ua pèth de vente de chaupatejar hens lo hangar aus sanglars. Ventolat mes beròi dia assorelhat dedicat a la prumèra d’un hestau lo de Martror en aceth vilatge deus con·hins d’enter Saut e Morlana. Aquera hèsta qu’amassava los pairs e los mainats, tanben los grans deu vilatge pr’amor en aqueth lòc retrèit e sauvat, sauvatge drin parièr tot un tribalh qu’ei a l’òbra qui remuda las energias : cors entaus adultes entà acompanhar los petits de la hialèra bilingua, collectatges e hicar a la lutz tornar d’un autor a mand d’estar quasi desbrombat : Narcís Labòrda. L’associacion Duas bòrdas e un molin que tròba lo nom en ua anóncia de bordatge deu Memorial o deu Mercure – non sèi mei – e qui hó paréisher Narcís Labòrda, lo jutge de patz.
Las musicas d’En Ondas • Marcel Amont canta los poètas gascons Alexis Peyret Los sovenirs de casa • Denis Fournier Percussions profile Les fils du Vent • Ventòla 2 • Larvath Istòria au còrn deu temps L’escòla • Nicolas Godin sonau • Erwan Hamon Yannick Martin Sous le Tilleul Venus Fly Trap • Manoel de Falla El amor brujo – l’amor broish – hantaume – dança de la paur • Viatge en lenga A la bòrda i a nau pans • Joan Francés Tisnèr and Co Tralhaires La passion de la sorcièra Sonaus de Joan Francés Tisnèr Winter Surge inedit
Duas emissions entà compréner miélher quin demorar actiu, alèrte e gaujós quan avançam en atge. Tanben quin acceptar d’estar ajudat e quin ajudar aus autes ! Que calè tota la larguesa e la benvolença d’un Joan-Pèire Poquet tà voler respóner a la demanda. Partida d’ua comanda, anullada per seguir… Totun que’m pensèi que i avèva a har dab lo tèma deu plan vielhir en Bearn, un subjècte d’interès ! Ua mini seria de 2️⃣ emissions 🎙d’En Ondas 📣📣📣 dab Joan-Pèire Poquet de l’Associacion Cultura de Noste e Adeline Biès-Robillard qui nse da lo parat de’n saber mei sus aqueth promotor arderós de l’occitan de Bearn. La setmana per viéner Adelina que ns’explicarà lo tribalh qui ei lo son.
En exèrgue l’eslogan celèbre « Que volem víver e tribalhar au País » ! Quauques agricultors, vinhèrs manifestants que se’n bremban d’aquesta passa. Qu’ei l’annada Robèrt Lafont ce’m sembla que lo devem l’eslogan Volem viure Al País. Lavetz qu’enteneratz au Joan-Pèire aquesta setmana dens En Ondas e la setmana per viéner que daram la paraula a Adelina. Bonas escotas !
Cultura de noste qu’ei dab lo Topin de Lenga au nombre deus qui organizan au Musée du Protestantisme Jeanne d’Albret la vienguda de l’exposicion « À la découverte du ciel de Gaston Febus à nos jours » (Escòla Gaston Febus). De non pas mancar, las conferéncias lo 6 de heurèr (dimars a 18h30) de * Francis Beigbeder « Lo nom de las estelas e de las constellacions en occitan e catalan ». Francis qu’ei Engenhaire de recèrcs. * Rémi Cabanac« Les origines de la vie sur terre ». Rémi qu’ei astronome (CNAP), Institut de Recherche en Astrophysique et Planétologie, Observatoire Midi-Pyrénées, Université de Toulouse III, Paul Sabatier, directeur scientifique de l’observatoire du Pic du Midi.
Dens l’emission que parlam tanben d’associacions autas on s’investeish lo Joan-Pèire : Per Noste Lo Topin de Lenga
Las musicas d’En Ondas • Jan Mari Carlòtti Linhana De vila vielha a la nòva ciutat • Artús Ors Chasse party • Ua, miduna, mitrèna 2 Jan de Libèra • Eths Micalets Aiganèu Lo primtemps qu’ei arribat • Daunas de còr Airetèras La ploma de perdiu Sonaus de Joan Francés Tisnèr Winter Surge inedit
Hadiu 
You must be logged in to post a comment.