Aus ueitanta-cinc, Pierre Corbefin se n’ei anat aqueth 30 de mai de 2025. S’ei tristèr de’u dever deishar, totun l’accion e l’òbra que perduraràn e qu’influenciaràn hèra de gents au-delà deu son passatge terrèstre.
Pierre Corbefin qu’estó un gran coneishedor e passaire de la dança, de la canta e de las arts popularas occitanas (1940-2025). Dab Francesa Daga, creatora de la companhia deus Balets Occitans en 1962 – qui junta, Pierre, en 1963 – que serà un deus actius d’aquera tropa de grana qualitat, per la vision e dens las realizacions. Qu’estó de 1984 tà 2002 lo director e gavidaire deu Conservatòri occitan a Tolosa (creat en 1970). Au micro d’En Ondas – que nse trobèm un 11 d’aost de 2018 per Astafòlk a Astafòrt – qu’avom la beròja escadença de l’enregistrar (au parat d’au mensh dus còps) e deu costejar parièr professionaument. Qu’estoi urosa en especiau d’aquera trobada, pr’amor aqueth còp qu’acceptè de que’s hasosse en occitan. Que testimonia d’ua hidança preciosa de cap tà En Ondas. Que ns‘entertienom en la soa companhia deu tribalh de tota ua vita per la dança, la canta, la musica e las arts occitanas. Qu’evoquèm a « Guilhem e Margalida se maridan”, lo lor espectacle de lavetz en mei deu bal a la votz que hasèvan dab Philippe Marsac. L’espectacle suu maridatge que joguèn a la glèisa d‘Astafòrt en obertura deu 1èr hestenau Astafòlk. A la fin de l’entervista, lo son complici Philippe Marsac, que’s junta a d’eth. Philippe en tant que creator e cavilha mestressa de l’eveniment qu’èra solide… a córrer pertot. Que’vs perpausi en navèra difusion aquera emission excepcionau de 2018, ua de las dedicada au purmèr Asta’fòlk a Astafòrt. Non manquetz pas lo hestenau en aost d’augan 08-09-10/08/25 https://sites.google.com/view/astafolk. Qu’ei lo còr sarrat que saludam a Pierre Corbefin, l’òmi deu petit pè com ac remarcava, tostemps dab grana tendressa, Crestiana Mosquès. Un òmi de la votz doça, pregona, grèu e la dança leugèra, leugèra, leugèra… Que podem trobar tornar a Pierre Corbefin dens un document difusat en 1971 realizat per Jean-Paul Terray per l’ORTF de l’Institut național de l’Audiovisuel https://fresques.ina.fr/borbolh-occitan-fr/fiche-media/Occita00085/le-conservatoire-occitan-de-toulouse.html.
Las musicas d’En ondas : • Les Voix Conservatoire occitan Lo Segader P. Corbefin Joan Luc Madier Dany Madier-Dauba Christiane Mousquès 1991 • Gabriel Valse Bal Folk Rondeau Grand’père Corbefin • MRC de Peire e Francesa Daga Nadal encara La tèrra es freja (Lemosin) • Perlimpinpin Fòlc TNaRez Tres sons seroletas – De mossur de maitinats • Daunas de còr Airetèras La maridam lonlèra a n’aquela mainada • Duo Corbefin Marsac Bal Gascon a la votz / à la voix L’auriòu qu’a nau plumetas / A Granada i a nau pins • Xavier Vidal e Prigent Le Bal La Novia/Bourrée d’Hugon • Les Voix Conservatoire occitan Le Joan Se’n Va A La Laura Dany Madier-Dauba, Françoise Mafrand, Christiana Mousquès 1991 Sonaus de Denis Fournier e Percussions Profile Le Mystère de la Pyramide
Últim episòdi de Passion ràdio : Qu’ei a un relai que’vs convidi dab aqueth navau e darrèr episòdi de la seria Passion ràdio : lo deus dus interlocutors que son Yann e Lucas. – Yann Artiguelongue« La ràdio qu’ei la beutat de la discussion” ; – Lucas Hugou« Escotem nse los uns e los autes”. Los dus a devisar de Radio Verdon que nse’n aprenen mei sus l’inscripcion geografica, l’istòria de la ràdio e las soas accions. Radio Verdon que hesteja los sons 40 ans en aost de 2025.
Que serà la difusion deus dus ultims pòdcasts d’Occigang ràdio : 1 – Thibaut e Leo que contan la lor Setmana de la bicicleta a l’Escòla bilingua de Salias Carressa e Cassabè e Sendòs 2 – Los de cinquau e quatau deu Collègi Felix Pecaut que son a huec tau Primtemps de l’Arribèra de 2025 dab la canta de l’edicion d’augan « Estelin”. Mercés a Madeline, Evelyne e Matiu ! e aus escolans e collegians : visca la ràdio tostemps !
Las musicas d’En Ondas • Los sonaus d’identificacion de Radio Verdon • Albèrt Marcœur Sports et percussions Les gonfleurs de bicyclette : la bicicleta qu’averà inspirat los eslhèves au parat de la setmana dedicada a l’escòla. Sonaus de Joan Francés Tisnèr Winter Surge inedit
Qu’ei ua estela e a l’encòp ua pèrla qui recebem dens En Ondas en la persona de Michelle Lestelle. Hemna de ràdio, creatora e acompanhadora de ràdios, formatora de tria que sòrt en 2020 de crear Gure kulturak Culturas nòstas Nos cultures suu Dab +. De notar qu’ei un servici qui ei assobacat suu pilòne e lo site de La Clé des Ondes sus Bordèu, ua solidaritat de saludar. Passion ràdio, qu’ei lo ueitau e avant-darrèr episòdi de la seria de nau (en Gasconha hèra de causas que son de nau) ; qu’ac hidam a l’expertisa e au vam de Michelle Lestelle. Longtemps administratora e jornalista a Radio Oloron, representanta-ligam indefectible de las ràdios de categoria A (las associativas) au FSER (Fons de sostien a l’expression radiofonica), responsabla sindicau au SNRL Sindicat nacionau de la radios Libras e geniau formatora au près de las ràdios e shens qué puish a l’economia sociau e solidària qu’a chic de secrets tà d’era. Michelle qu’a ua vision a 360° deu monde de la ràdio e que nse ditz « la ràdio qu’ei formacion informau ».
1981 : creacion de 2000 ràdios en França : ua enòrma hami de presa de paraula ! 2024 : 770 servicis radiofonics de categoria A ajudats peu Fons de sostien a l’expression radiofonica. Un detzenat de servicis creats per an (mes pas mei en modulacion de frequéncia). Chic de disparicions. Lo 30% de las frequéncias qu’ei produsit per ràdios de categoria A (associativas).
– Las capsas difusadas de Occigang radio que seràn suu Carnaval (la fin de l’experiéncia t’augan). • Lo Carnaval deus sheisaus deu Collègi Felix Pecaut ; • Las activitats de Carnaval per l’Escòla La Fontaine ; • La sortida au Carnaval vista peus CM2 de l’escòla La Fontaine. Aqueras capsas radiofonicas que las devem aus establiments deu public hialèra bilingua Salias Carressa e Cassabè e Sendòs e parièr au collègi deu sector : lo collègi Felix Pecaut de Salias de Bearn.Mercés aus professors : Madeline (escòla La Fontaine), Evelyne (CollègiFelix Pecaut) e Matèu (Chancaires).
Las musicas d’En Ondas • Carnaval los saxos de la Fricassèira dab Ania Hourdebaigt e Sylvaine Rouveyrol and C° + Dança deus bastons • los sonaus de Gure Kulturak – Culturas Nòstas – Radio nos Cultures • Xarnege Musica de contrabanda Branlo • De La Crau Tempèri Chaman Sonaus de Joan Francés Tisnèr Winter Surge inedit
Dens Passion ràdio la 7au : Radio Sent-Africa, libra e gaujosa de 1981 enlà ce ditz la gahadera publicitària. Franck CARRIERE lo noste interlocutor qu’ei animator d’antena en carga de l’actualitat locau. Radio Saint-Affrique. 5, arrua Hoche – 12400 SENT-AFFRICA. https://www.facebook.com/radiosaintaff/ Lo site internet oficiau radiosaintaffrique.com Agitator, liberator de paraulas, bolhon de cultura, mèdia, organizator de concèrts, descobridor de talents musicaus, organisme de formacion…formacions certificadas qualiopi : per tant que sian tranquilles qu’asseguran un servici de qualitat ! Installada uei en centre-vila de la Vilòta e dispausant de quate frequéncias qu’ei neishuda d’ua ràdio pirata creada per dus visionaris libertaris [de relativizar de tant qu’èran numerós los qui sentivan com insuportabla d’aqueth temps la confiscacion de la paraula per un cèrt eleit parisenc] qui s’i escadón a la jòga. « l’objectiu qu’èra purmèr de perméter a un maxímum de gents de s’exprimir ; que calèva absoludament que las gents parlen e que’s parlen », ce brembava – aus quaranta ans de l’estacion de ràdio dens Le Progrès Saint-Affricain” Alain Guillot, cofondator de « Ràdio Pirata » dab Jean Sicard. « A aquera epòca, qu’i avèva ua retencion terribla au nivèu deu discors, pr’amor qu’i avèva enqüèra vielhas bregas de comptes a reglar, dab mai de 68, dab Larzac. L’esperit qu’èra abans tot, lo respècte deus autes e de si medish, la libertat absoluda de consciéncia. » Engenhaire a la direccion de las telecomunicacions, lo normand Alain Guillot qu’avèva demissionat de l’administracion entà s’installar a Sent Africa com artisan electronician. Jean Sicard qu’èra agricultor e installat a Montlaur. Animats per ideas anarquistas e libertàrias, los dus amics que’s lançan lavetz dens la creacion d’ua ràdio pirata, ancèstre de Ràdio Sent Africa. « Ua pirata que s’a hèit lo torn de Sent Africa – qui non deu pas estar ua megalopòli, en 2021 que tòca aus 8000 poblants – shens jamei hà’s arrestar per las fòrças de l’ordi », qu’ei díser la qualitat d’invisibilitat qui avèvan ! Vediam dab Franck Carrière se tot aquerò e’s verifica uei tanben!
Occigang Podcast de l’Ecole La Fontaine de Salias (de Bearn) ! lo tèma deu Carnaval 2025 RESISTIR ! – Los personatges – Los desguisaments – La sortida au Carnaval segon los CE1
Que saludam dens aquera edicion d’En Ondas lo despart, lo dus de junh, d’un gran de la dança, de la canta e de las arts popularas occitanas : Pierre Corbefin (qui vadó en 1940). Dab Francesa Daga la creatora de la companhia deus Balets Occitans en 1962 (Pierre que’us junta en 1963), que n’ei un deus actius. Que podem escotar a Pierre Corbefin dens un document, difusat en 1971, realizat per Jean-Paul Terray per l’ORTF, document de l’Institut national de l’Audiovisuel https://fresques.ina.fr/borbolh-occitan-fr/fiche-media/Occita00085/le-conservatoire-occitan-de-toulouse.html. Qu’estó Pierre Corbefin, de 1984 tà 2002, lo director deu Conservatòri occitan a Tolosa (creat en 1970). Si’u voletz escotar dens En Ondas dab lo son complici Philippe Marsac que’vs perpausi aquera emission de 2018 dedicada au purmèr Asta’Fòlk a Astafòrt (en aost d’augan tanben). https://hadiu.eu/2018/10/08/en-ondas-setmana-41-pierre-corbefin-philippe-marsac/ Qu’ei lo còr triste que saludam a Pierre Corbefin, l’òmi deu petit pè com se remarcava tendrament Crestiana Mosquès, de la votz doça e de la dança leugèra, leugèra, leugèra…
Las musicas d’En Ondas • Musicas de Carnaval en relacion dab Occigang Podcast de l’Ecole La Fontaine de Salias (de Bearn) ! • Carnaval qu’ès un brave òmi • Mardi gràs qu’avè • Jan Petit • Sonaus de Radio Sent-Affrica • Duo Corbefin-Marsac Bal gascon a la votz De Tonens a Marmanda Sonaus de Joan Francés Tisnèr Winter Surge inedit
Qu’ei Joan-Jacme Dubreuil qui juntam entà devisar de Ràdio Cap a Cap. Ua ràdio suu web qui ei aperada a passar en DAB+, qu’ei autanplan difusada en FM en Bascoat. En las Lanas fin deus ans 2010, escàder s’i a apitar un servici radiofonic en modulacion de frequéncia qu’ei ua jòga vertadèra : jòga fisica au véder de l’espaci e deu cobèrt vegetau, jòga politica pr’amor, los projèctes autes que de servici public estataus, que’s cau lhevar de d’òra entaus poder miar. Dab Jacques Lesgourgues, Miquèu Baris, Pèir o Fanny Lartigòt e quauques autes, Joan-Jacme Dubreuil que relhevèn la mira d’ac en occitan gascon. E honha que honharàs… l’arriu que pren endom drins a drins. https://www.radiocapacap.fr/ https://www.facebook.com/radiogascona https://www.perlogascon.com/
actors, e sonaus
Costat Occigang podcast qu’avem lo plaser de difusar 3 capsas de l’Escòla La Fontaine : « Ompra e Lutz », « Lo Parlament au lavader » e « L’esdejuar equilibrat » ; en companhia deus cinquaus deu Collègi Felix Pecaut qu’ei de « La Passem » qui ns’entertienen… atau be sabem on an podut trobat los mejans de realizar aqueras capsas radiofonicas d’Occigang [Salias, Carressa e Cassabè, Sendòs]. * Escòla La Fontaine – Ompra e Lutz – Lo Parlament au lavader deu Hedàs – L’esdejuar equilibrat e dab lo * Collègi Felix Pecaut – La Passem 5aus : on sabem quin ei finançat Occigang
Las musicas d’En Ondas • Trencadit Las Honts Dauna Blanca • Joachim Montbord La Calorada • Laüsa Los Caulets • Trencadit Las Honts Bidau Ròcahòrt • Chancaires Anem La Passem • Delbau Qui frappe à ma porte • sonaus Ràdio cap a cap (de Capsús a Capvath) Sonaus de Joan Francés Tisnèr Winter Surge inedit
La cinquau edicion d’En Ondas de la seria Passion ràdio qu’ei, aqueste còp, tornar en companhia d’Esther Mimart tà Ràdio Occitània. Capihonem tà hens l’istòria de la vaduda de las ràdios libras tanlèu 1981 (que’vs brembi qu’èra un mes d’aost de 81 quan vadó Ràdio Occitània), de la lor durada e en lo cas qui ns’ocupan de la transmission d’un servici radiofonic. Esther que’ns hidè lo còp passat que Ràdio Occitània, entad era, qu’ei com ua sorrina. Que persegueish de nse partatjar l’arsec e lo saber qui a sus la ràdio, la ràdio libra en generau e Ràdio Occitània, en especiau. Ràdio Occitània qu’ei ua istorica de la ràdio FM, en modulacion de frequéncia, sus Tolosa e Sent Gaudenç (un estúdio mei) e dens autes lòcs d’emission tornar.https://www.facebook.com/radiooccitania
Las capsas d’Occigang que son aqueste còp de l’Escòla La Fontaine de Salias (de Bearn) – Setmana deu secutament – Talhèrs de musica CERC – Lo CIRDOC
En 1981, se 2000 ràdios que puntejan lo cap en l’exagòne, Esther que nuància en parlar meilèi uei de 2000 emetedors e non pas de servicis perèns. De servicis perèns e la crisi deu ‘projècte de lei de finança a l’invèrn de 24-25 770 servicis, 2000 personas qui’n viven…
D’autes apassionats de ràdio a partir de la setmana per viéner. 1/ ua fòrma de bilanç dètz ans i a cuelhuda en 2013 a Brussèlas e Marselha Agus Hernan e François Alfonsi, 2/ la ràdio montanhòla Pirenèus ràdio dab Eric Buisan, 3/ la oèb ràdio lanusqueta e Louis de Hapchòt webràdio, 4 & 5/ duas emissions dab Esther de Roc. De perseguir dab Joan-Jacme, Michèle, Yann e Lucas e Frank [Web ràdio Cap a cap, Gure kulturak Culturas nòstas, ràdios Verdon e Sent Africa]. Que saunegi d’ua aligança radiofonica entà l’occitan : cultura e lenga. Ne i arribaram pas solets a har enténer l’occitan en tota la soa riquessa. Parièr entà la premsa escriuta e la tele. Los servicis d’Estat n’assumeishen pas gran causa. Que cau adara avançar en aqueth sens en comptar dab nosautes.
Las musicas d’En Ondas • Erik Truffaz Arkhangelsk • Femmouze Tolosa Tango • sonaus de ROC • Roger Waters Radio K.A.O.S. Radio waves • Patti Smith Out of Society Free money Sonaus de Joan Francés Tisnèr Winter Surge inedit
La quatau e la cinquau edicion d’En Ondas, de la seria Passion ràdio, que seràn en companhia d’Esther Mimart tà Ràdio Occitània. Aqueths dus numèros que son lo parat d’abordar la question de l’istòria de la vaduda de las ràdios libras tanlèu 1981 (aost de 81 en l’ocurréncia tà Ràdio Occitània), de la lor durada e en lo cas qui ns’ocupan de la transmission d’un servici radiofonic.Esther Mimart que nse partatja lo son arsec e lo son saber sus la ràdio en generau, la ràdio libra e Ràdio occitania, qui ei ua istorica de la ràdio FM, en modulacion de frequéncia, sus Tolosa e sus Sent Gaudenç. Las capsas d’Occigang que son aqueste còp de l’escòla La Fontaine e deu collègi Felix Pecaut de Salias. Un moment doç tà jo de constatar qu’en 2025 los escolans de La Fontaine, un còp passats collegians que guardan la memòria deu Quaucom lo rite d’integracion, deus nats de l’an, per la companhia deus quites mainats. Un tribalh suus rites calendaris que tribalhèn en 2022, 2023 e 2024. La melodia de la canta qu’ei estada creada tornar per Joan-Miquèu Dordeins entaus calandrons d’Ortès. Lo Collègi F. Pecaut 5aus-e-4au-Quaucom-e-Nadau. E en seguida l’Escòla La Fontaine que nse partatja Lo rituau de la data e L’escòla panada, un mercés deus bèths a las professoras Madeline e Evelyne !
Las musicas d’En Ondas • Larvath L’escòla • Martina e Rosina de Pèire Los dos filhets del Rei 1974 • Bueltea TNRZ / sonaus de ROC / Interludi • Lluis Llach Porrera Món Món Sonaus de Joan Francés Tisnèr Winter Surge inedit
![40 lugrans radiofonics d’En Ondas [oct. 24-junh 25]](https://hadiu.eu/wp-content/uploads/2025/07/24-25_40_lugrans_den_ondas.jpg?w=924&h=0&crop=1)
![En Ondas setm. 27 Pierre Corbefin [1940-2025]](https://hadiu.eu/wp-content/uploads/2025/06/2527_pierre_corbefin.jpg?w=924&h=0&crop=1)
Hadiu 
You must be logged in to post a comment.