Deishem-nse embarcar per l’umor flegmatic de Joan Miquèu Dordeins au parat de la sortida de l’àlbum Lo Viatge de Joan Petit. Encontrem tanben a Fanny Lartigòt l’illustratora deu libe entau joenèr Lo Viatge de Joan Petit *. Dus envitats dens la presenta edicion d’En Ondas, l’autor e l’illustratora deu liberòt en çò de las edicions Reclams en 2025. Joan Miquèu Dordeins qu’ei ensenhaire a la retirada e autor. Qu’a publicat darrèrament aus Reclams lo roman policièr Murtres en cadena (2023) e un recuelh de novèlas en 2021 a Per Noste Dus dias sonque. Que se’n ditz mei suu liberòt entau joenèr qui pren per eròi un Joan Petit au quau e s’escaden plen de benalèjas. Ua edicion drin singulara per part cuelhuda en ua crampa de convalescéncia, la vita quauque còp que resèrva causas inatendudas. Que nse permet d’evocar lo miei espitalèr, la vita e la recuperacion arron un accident vascular cerebrau. Autanplan l’importància de la lenga soa, l’occitan, dens las relacions umanas e los projèctes, la memòria… e los projèctes a maugrat que sia retrèit pro com tostemps lo Joan Miquèu entau parlar de çò qui a suu telèr.
* Tà’n saber mei sus Joan Petit, lo personatge istoric deu sègle XVIIau, un petit recèrc hèit entaus talhèrs de Yuan Gong qigong en occitan qui asseguri despuish quauques annadas e qui podetz léger ací baish :
De v’indicar, per escàs, lo tresau numèro de la revista annau de l’ABC (dab ua B hauta o de Barcelona aquera) qu’ei L’ABC del saber : Umans tròp umans ?, qu’ei tot juste pareishut.
Las musicas d’En Ondas • Manuel De Falla sortilègis • Simple Tres La canta d’Elvís • Gilles Chabenat Edouard Papazian Le Traité des Songes L’œil de la lettre • Laurent Audemart Escotija politiko • Tazzuf Camaleons Daltònics Sota Mazurca • Chocolate Jesus • Perlimpinpin Fòlc Ua botelha a la mar • Aèdes – Gaves – Coma l’aiga Sonaus de Joan Francés Tisnèr Winter Surge inedit
Lo 8 de deceme de 2024 que’s debanè lo Topin de las Quilhas de Nau a Podens en Shalòssa. Lo parat d’amassar monde a l’entorn d’aqueste, hòrt estetic e fin, jòc de quilhas qui s’adreça a totas e tots. Coneishedors o curiós que’n sabón mei mercés a l’energia comunicativa deus deu club arcuelhedor un deus màgers de la federacion e qu’avom los demostradors e las demostradoras qui non s’estauvièn pas entà partatjar e parlar de la lor passion. Lo public deu Topin de Lenga que s’i podó parièr essajar entà véder se ne’us plasora pas aqueth jòc fisic e d’astruguessa tant emblematic de la Gasconha sud occidentau : Bigòrra, Shalòssa e Bearn. Aqueste espòrt en despresa pr’amor de rasons culturaus e societaus : imaginem la baisha drastica deus estanquets lòcs privilegiats deus plantièrs aqueras areas quadradas, qui hè que de terrenh de jòc n’i son chic mei. Non pleitejam pas per un consum inconsiderat d’alcoòl mes per ua revitalizacion de las campanhas o deus quartièrs dab lòcs sociaus e comerciaus. Per exemple non i a guaire a Carressa e Cassabè, hens lo parçan deu Gave d’Auloron, qu’ei lo quite plantièr qui assobaca adara la pastisseria-panateria Lo molièr. Solide los gavidaires que comandèn ua fresca memòria au Yann Chatelin mes perqué non pas suggerir un plantièr acostat aus ediles ? Ajam a l’esperit la non presa en compte d’aqueth hèit culturau e fisic peus ensenhaments escolars quan poderé estar diferent estóssem respectats com los qui èm. Saunegem aus 32% d’ensenhaments «guanches» en las Islas Canàrias, en l’archipèl los mainats qu’an lo tèrç d’ensenhament, per exemple adobat dab silvo (lo shiular d’acerà) qui fòrma part de l’ensenhament de la lenga, las canas – qui son chancas tà avalir la pregondor e la distàncias en guardar los tropèths, en art ceramica e en dança pròpias. Estóssem autant gadiats e considerats : la lenga a l’escòla e shiulada autanplan – quantes lingüistas e gramaticians e escrivans n’averem pas, los instruments, las cantas e las danças – quantes artistas e creators non gessirén pas d’aquestes ensenhaments, chancas e quilhas – quantes monde plan hens la lor pèth e ahortits, calmas e concentrats non sortirén pas deus lòcs educatius ! Com ac suggereish lo noste interlocutor Jean-Philippe Larrère – estatjant de Sent Medard e jogador a Podens – qu’ei a l’escòla petita que tot aquerò e pòt e e deu començar ! Jean-Philippe Larrère que’u mercejam de s’estar prestat au jòc de l’entervista e que’u ne sabem grat de la soa paciéncia. Jean-Philipppe Larrère qu‘averam plaser a’u costejar tornar. Que’vs prègui de créder qu’ei tostemps partent entà recéber monde a l’entorn d’ua partida de Quilhas de Nau a Podens o a Sent Medard o en lòc que sia.
Que senhalam mei que podem demandar a la federacion un torn de talanquèra desmontable dab un jòc de quilhas de Nau adultes òmis o hemna e i comprés mainats qui ei mobile e qui’s pòt prestar entà har iniciacions o partidas. De notar aqueste torn de talanquèras de jòc de quilhas de nau dab la porteta qu’ei un don d’ua equipa artistica qui coneishi de pròche. Tà l’espectacle Quate e Choès que son tres magnifics jogadors de Pau Gilbèrt Lafenêtre, Fefé Lartigue e François Birou a l’arrastèra-escoba ipnotica qui s’i volón gahar. Sus ua creacion musicau de Joan Francés Tisnèr, cantada per Manufacture Verbale e ua coregrafia d’Yves Bernet. A la dança contemporanèa Sonia Onckelinx e tradicionau Puça Horndevath, Claudine Delille, Crestiana Mosquès e Lionel Dubertrand, au cuu-torn de la fin deus ans 90 e 2000, e dèn ua pèça dont la critica de dança deu jornau Le Monde, Dominique Fretard e relhevè la jòga « mei hòrta que la nocion d’aleatòri en çò de Mercè Cunningham”. Quauques videos de Quate e choès d’espiar per aquiu : https://www.youtube.com/playlist?list=PLdFN97iu7wCMe5q5-3h7yX4FYJiGU4BWO
De’vs senhalar que las aventuras mesadèras deu Topin de Lenga que seràn pontuadas per ua Hèsta de la lenga : sauvatz ve’n la data tot lo dia deu 5 de julhet de 2025 a Salas de Baura. Sancèra dedicada a ua lenga viva e inventiva que perpausarà i comprés iniciacions a las quilhas : https://www.facebook.com/profile.php?id=100081099690336.
Las musicas d’En Ondas • Albert Marcœur Sports et percussionsSports en plein air • Cocanha PuputLo Cotelon • André Ricros e Gerard Douvisy Un piano dans le préDieu garda aquel que l’a plantat • Diubiband Las hèstas de Cuqueron en mercejar en especiau a Eric Beillé, arderós en tot e i comprés en quilhas de Nau. Jogador cantaire e iniciator a las quilhas de nau. • Erik Truffaz Saloua Spirale • Joan Francés Tisnèr Transpòrts Tisnèr S.A. Empensat [Branlo en còrda regular] Sonaus de Joan Francés Tisnèr Winter Surge inedit
L’èrba serena qu’amuisha lo camin. • Lo somari de Patrimòni numèro 68 de mai-junh de 2017 • Lengas e Poders 2016-2017- sesilha 5, Joan Pèire Cavaille : Daniel Fabre, patrimòni etnologic e patrimòni lingüistic. •Magali Mariaud qu’ei la nosta guida erborista. Que plegam l’esquina cap a la tèrra de Provença de cotria dab Magalia Mariaud e Léon lo son òmi. Qu’ei question de i cercar e trobar èrbas e saladas un hèish. Que mercegi au Leon e ben segur màgerment a Magalí qui’m deishè fotografiar la soa garba e qui nse’n regalè : un delici, a Jean Marotta lo noste sesame e a Joan Francés Tisnèr – viengut per tot auta causa – per l’enregistrament.
De senhalar la parucion imminenta de la Flòra illustrada de Josiana Ubaud en çò de Letras d’Òc : 30 euros + 6 euros de pòrt en soscripcion
Flòra illustrada Josiana Ubaud Letras d’Òc 2025
Las musicas d’En ondas : • Erik Truffaz/Face-à-Face Quartet [Disc 2] The Walk Of The Giant Turtle (Intro) (Live 2006) • Erik Truffaz/Face-à-Face Quartet [Disc 2] Flamingos (live 2006) • Rosalina Cortial/Aital Va La Vida Troces D’un Erbier • Patti Smith Trampin’ Mother Rose • Feiz Noz Moc’h/Feiz Noz Moc’h Colorina D’Arrósa (Branlo) Sonaus de Joan Francés Tisnèr Crane airways deu disc Transpòrts Tisnèr S.A. e lo remix de Francés Dumeaux tà sortir de l’emission
En navèra escota [1èra edicion abriu de 2015], ua edicion peiregòrda qui batièm « De la cava au Paradís » a perpausar :
* ua entervista de Marçau Peyrouny a recéber las palmas academicas en deceme de 2014 a Bordèu.
* un papèr sus Colèras e retrachs, lo libe de cronicas de Micheu e Danís Chapduelh en çò de l’IEO (dusau liurason). Libe adobat d’un dessenh de Frederic Fijac autant impertinent e gausat com n’ei lo tèxte, descobritz ! *la difusada tornar d’ua entervista de 2007 de l’escrivan-traductor-editor Bernat Lesfargas, nom deu quau l’Institut Ramon Llull e decidí de batiar la bibliotèca consacrada a las traduccions d’autors catalans.
Las musicas d’En Ondas
* José James While you were sleeping Angel
* Joni Mitchell Beginning of survival Passion Play (The Story Of Jesus And Zachius…The Little Tax Collector)
* Joan Pau Verdier Fanck Luton Color de femna L’amor Marcela Delpastre
* Massilia sound sistem Chourmo Tribute to Pèire Vidal (Votz d’Ives Roqueta) * Naviòl Sud e nòrd Riban
En Ondas qu’ei on ei qui tornam trabucar au Narcís Labòrda e qu’èm en companhia de Joan Eygun, lo creator e lo director de Letras d’Òc-Camins, las edicions joenas vadudas au miei deus ans 2000. Qu’èra viengut tà evocar lo desconeishut Narcís Labòrda au vilatge qui’u vedó a vàder (1835), estar maire e morir (1885). Qu’un lòc com Sent Medard e’s torne apropriar lo tribalh d’un autor qui escrivó los tres quarts de la soa òbra en occitan bearnés n’ei pas anodin. Que significa que l’expression poetica, de pròsa o politica qu’èra lavetz hèra mei plan partatjada tà hens la societat tota au cuu-torn deu sègle XIXau e XXau. Probable d’alhors que perdurè mei enlà tau ua afirmacion suu telèr shens cès arrehèita. Joguem que uei lo dia que contunha ! Duas bòrdas e un molin Hestau de Martror Topin de Lenga
Tà arribar d’ací quauques dias la Flòra illustrada de Josiana Ubaud en soscripcion a Letras d’Òc, de pas mancar !
Las musicas d’En Ondas • Deodat de Severac (St Feliu de Lauragués 1872 – 1921) Coin de cimetière au printemps • Joan Francés Tisnèr EBTè! La baish en tèrra plana (com ua creacion paisana) • Chants d’Auvernha Josèp Cantaloba Dama Kiri Te Kanawa • Giovana Marini Pier Paolo Pasolini Dansa di Narcis II • Guilhem Lopez lo qui camina celui qui marche pour ne pas se trouver Sonaus de Joan Francés Tisnèr Winter Surge inedit
Lo vent que s’ei invitat dens l’enregistrament miat a Sent Medard, cuelhut com a avut un momentòt Clamenç Florós, un deus iniciators deu prumèr Hestau de Martror. Que ns’ac voleratz perdonar. Que soi juste l’autora, productora, prenedora deu son, montaira, realizatora e difusaira d’En Ondas… E n’excellii pas en tot !
Qu’ei au parat d’un Topin de Lenga de l’abòr de 2024 : lo matin tà hens la seuva e dinc au Camp roman a erborizar e camparonejar – perdon peu neologisme – dab Cristau Contreiras e per la fin a sortir per ua vit renduda au bòsc. Non ns’ac avoran pas dit, non se’n serem menshidats… Un temps suspenut en natura : los mainats que se’n hasón ua pèth de vente de chaupatejar hens lo hangar aus sanglars. Ventolat mes beròi dia assorelhat dedicat a la prumèra d’un hestau lo de Martror en aceth vilatge deus con·hins d’enter Saut e Morlana. Aquera hèsta qu’amassava los pairs e los mainats, tanben los grans deu vilatge pr’amor en aqueth lòc retrèit e sauvat, sauvatge drin parièr tot un tribalh qu’ei a l’òbra qui remuda las energias : cors entaus adultes entà acompanhar los petits de la hialèra bilingua, collectatges e hicar a la lutz tornar d’un autor a mand d’estar quasi desbrombat : Narcís Labòrda. L’associacion Duas bòrdas e un molin que tròba lo nom en ua anóncia de bordatge deu Memorial o deu Mercure – non sèi mei – e qui hó paréisher Narcís Labòrda, lo jutge de patz.
Las musicas d’En Ondas • Marcel Amont canta los poètas gascons Alexis Peyret Los sovenirs de casa • Denis Fournier Percussions profile Les fils du Vent • Ventòla 2 • Larvath Istòria au còrn deu temps L’escòla • Nicolas Godin sonau • Erwan Hamon Yannick Martin Sous le Tilleul Venus Fly Trap • Manoel de Falla El amor brujo – l’amor broish – hantaume – dança de la paur • Viatge en lenga A la bòrda i a nau pans • Joan Francés Tisnèr and Co Tralhaires La passion de la sorcièra Sonaus de Joan Francés Tisnèr Winter Surge inedit
Shens papèrs qu'ei ua produccion Art'Òc, prèmi deu public au Consonance Music & Dance Film Festival (Los Angeles, Etats Unis) seteme de 2018, 2au prèmi deu filme experiumentau au 12 Month Film Festival de Cluj-Napoca (Romania) 2018, ...
Privacy Public
Instància d’origina indymotion.frCategoria FilmsLicéncia Atribucion - Pas comercial - Cap de derivacionLenga OccitanDurada 6min 39sec
Las musicas d’En Ondas • Hilhas deu Vent Cants occitans e Berbères Ay Madre e La Prima votz d’Amel Duret e de Fabiana Vayrette-Pechali • Shens Papèrs Felip Espinasse Canta dab Fabiana enter autas e dans la video qu’ei ua istòria en rondèus dab plen d’amics qui dançan e Anafi qui hè partida deu public, pensada a Paulette Faucon-Marty qui trobam de manca. • JM P Espinasse Camins extrèit Sonaus de Joan Francés Tisnèr Winter Surge inedit
Lo teatre popular qu’ei de compte har en Bearn. Brembem-nse lo milierat de personas vienut enténer lo teatre de Palay Place Clémenceau a Pau e shens sonò, au començar deu sègle vintau. Salias e l’Amicala Laïca deus Antins dab Al Cartero, Sauvatèrra dab Jantin deu Sabalòt e los Bearnés gaujós (pas los Esberrits gaujós com dit dens l’emission, sauma la qui ès…) e plen d’autes lòcs qu’an viscut tantas aventuras teatraus. Puish Per Noste que publiquè teatre d’Hubèrt Lux, Gilabèrt Nariòo, Miquèu Grosclaude e Eric Gonzalès pr’amor las tropas qu’èran en cèrcas de pèças jogaderas e que los qui sabèn escríver que’s volèvan prestar a l’exercici dab tot l’arsec qui èra lo lor. En los darrèrs detzenats d’ans ua tropa qu’a perseguit un tribalh exigent. Basats au vilatge de Saut de Navalhas e a maugrat los cambiaments sociologics e lingüistics, los Comelodians que son d’aqueths qui an seguit. Qu’ac hasón en un vilatge rurau, en se servir deu vam de l’educacion populara e en cultivar ua equipa de tria qui nse n’aviava plan : a l’escritura (e longtemps au jòc) Marie-Jo Etcheverry (inenarrabla dens lo tèxte deu vent dens las brancas de Sassafràs de René de Obaldia) , a l’empontatge Alan Muñoz e au jòc teatrau au darrèr de Fernand Dauguet, de la votz e de l’estatura impressionantas, solide generacions d’actors qui nse brembam dab plaser un Louis Petriat per exemple. Un quart de sègle o mei d’un tribalh acarnassit qui’us miè a’s produíser a Barcelona, en Generalitat de Catalonha, i comprés. Dens la presenta edicion d’En Ondas qu’averatz lo parat d’escotar a Marie-Jo Etcheverry : tenguetz l’aurelha pr’amor lo horvari qu’ei impressionant : la sala qu’èra combla e a maugrat de ns’estar estremadas, los actors qu’èran tant excitats… La pèça Lo medecin de Peiralada qu’ei adaptada de l’autor de Montpelhièr Max Rouquette, mètge eth medish e tant adret a hicar a jorn l’amna deu monde. La pèça de Roqueta qu’ei seguida deu Gelós, la carronha e lo filosòfe de Joan-Baptiste Poquelin dit Molière. Que juntaram tanben a Loana e Adelina Biès-Robillard, duas de las actoras deu Medecin e deu Gelós : qu’averetz vist lo bonur deu pair e gran pair de las duas, apuish a la recepcion qui se’n seguí ! E que clavaram en companhia de Fernand Dauguet sus ua mena de bilanç e perspectivas : b’ei complicat la transmission si avem atentas…
Las musicas d’En Ondas • Ardalh La molièra La Nòvia • Talabrene Deconcerto1 • Rouqueta La mòrt de Còstasolana : recitant Rotland Pecolt. Dens aquera edicion qu’averatz lo parat d’escotar un aute tèxte jogat peu regretat Rotlang Pecolt (mort en 2024) : La mòrt de Còstasolana sus la musica de Frantz Schubèrt qui inspirava tant Max Roqueta « La gojata e la mort”. Laurent Audemard. • Ua Dòna Miquèu Montanaro Teatre • Valhant Franzin Sete La Bèla naissença I pro de gent • Cie Maître Guillaume Bransle coupé Ballet de la Comédie _ Mariana Sonaus de Joan Francés Tisnèr Winter Surge inedit
Hadiu 
You must be logged in to post a comment.